GULU. Lubara pa Acoli, Okot p’Bitek (lyeli) aye ocoyo nyig lokke wa ki dwan me wero ne wa i mwaka 1956, mwaka abicel ma lobo Uganda onongo bene pwod peya ocako loye pire kene.
Lubara pa Acoli tye ki nyig lok magi ma an anongo ki bot wora, Lapwony Luka Labeja (L.L. Labeja) ma mwaka me teggi mere dong i kare ni tye 94, kun ki nywale i mwaka 1928.
L.L. Labeja obedo i kin lukancila pa Acoli i Acoli Dictrik Kancil) ma okwongo i mwaka 1960.
Labeja bene obedo lawer ki lapwony wer ma woto i ngolo pyem me wer i rwom ducu me gangi kwan me lobo Uganda (National Music, Dance and Drama Adjudicator). Gin aye gubedo lutino ki ludite me Acoli ma gkwongo wero Lubara pa Acoli i dictrik me Acoli ma ongo gang kal mere tye Gulu.
Ci dong ka waneno mwaka me coyo wer man, nyuto ni pe tye ngat mo onyo latin mo ma twero waco ni en aye nyo gwok ecoyo wer Lubara pa Acoli i kine kare man, con nyo nyen nikato mwaka 1956 ma Okot p’Bitek ocoyo kwede wer man.
Dwan me wero Lubara man ma gitye ka keto ikare man i Radio ni pwod winye ni tye ongak woko kaka mogo manok ma mito ayuba labongo cwiny me lara mo. Cwiny mo ni gwok nyo an nyo wan aye wacoyo ki wa wero Lubara myero ka twere obed peke, pien man wer me pilo wii kaka kulo me Acoli, ci mito toro wic iye. Lupwonye wer tye mapol i lobo kany ma gukwano kit me wer. Pire tek ni nyig lok me wer (syllables) myero obed ma rom ki wel nukta me wer (musical notes, nyo notation).
Nyig lok me Lubara pa Acoli tye kit man:
(i) Lubanga gwok La-wi Rwodi, Kure kom tek mere,
Mi gum ki kuc i gang-kal-le, Ot ker me Acoli.
Wa pwoyi Rwot madit, Pi La-wi Rwodiwa,
Kure, tire, i tic mere pi Acoli.
(ii) Lubanga gwok Langol-kopwa, Kure kom tic mere,
Mi bote ryeko ki tek-cwiny, Ki ngolo kop atir;
Wapaki Rwot madit, Pi Langol kopwa man;
Kure, cikke, i tic mere pi Acoli.
(iii) Lubanga gwok Rwodi ducu, Kacel ki lutic duc,
Mi botgi mar ki ribbe me tiyo pi lwak.
Wa legi Rwot maber, Pi lutic mewa duc;
Gwokgi, ribgi, pi tic megi pi Uganda.
